በሃገራችን ኢትዮጵያ ካሉ አንጋፋ እና ግንባር ቀደም የመንግስት ተቋማት መካከል በ1935ዓ.ም የተቋቋመው የ81ዓመቱ የዛሬው የሲቪል ምዝገባ እና የነዋሪነት አገልግሎት ኤጀንሲ ቀዳሚው ነው። ይህ ተቋም ኢትዮጵያዊያንን ጨምሮ ለውጭ ሃገር ዜጎች ላለፉት ዓመታት አገልግሎት እየሰጠ ያለ ሲሆን በተልዕኮው እና በአደረጃጀት በርካታ ለውጦችን እያደረገ ዛሬ ላይ ደርሷል። ይህ አንጋፍ ተቋም በቴክኖሎጂ ጎልብቶ በሃገሪቱ በርካታ አዳዲስ ነገሮችን እያስተዋወቅ ያለ ሲሆን በአሁኑ ወቅትም ወሳኝ ምዕራፍ ላይ ይገኛል። ኢትዮጵያ ከሲቪል ምዝገባ ስርዓት በመጠቀም ዘመናዊ እና መሰረቱ የጠነከረ የመንግስት ስርዓት እንድትገነባ ለማድረግ እየተሰራ ያለው ስራ ገና በጅማሮ ያለ ቢሆንም አዲስ አበባ በቀዳሚነት ሚናዋን እየተወጣች ያለችና ዘርፉ የነበረበትን ችግር ቀርፋ በጥቂት ዓመታት ውስጥ በአህጉራችን የተሟላ የሲቪል ምዝገባ ስርዓት የሚተገበርባት ከተማ ለመሆን እየሰራች ነው። የሲቪል ምዝገባ እና የነዋሪነት አገልግሎት ኤጀንሲ ከነበረበት በርካታ ውስብስብ ችግሮች ለመውጣት እ.ኢ.አ ከ2015ዓ.ም ጀምሮ በቴክኖሎጂ፣ በአሰራር፣ በሰው ሃብት ፣ በአደረጃጀት እና ምቹ የስራ አካባቢ መፍጠር ላይ ያተኮረ የአገልግሎት ማሻሻያ የተቋም ግንባታ ወይም ሪፎርም ፕሮግራም ቀርፆ እየሰራ ይገኛል። በአሁኑ ወቅት ኤጀንሲው ዘመናዊ የመረጃ ማዕከል /DC/፣ የቴክኖሎጂ መሰረተ ልማት ፣ ሃሰተኛ ሰነድን መከላከል የሚያስችል እጅግ የረቀቀ የምስጢራዊ ህትመት መሳሪዎች፣ አገልግሎት አሰጣጡን ቀልጣፋ ለማድረግ የሚያስችሉ የደህንነት ካሜራ ቁጥጥር ስርዓት እንዲሁም ይህን ሊመራ የሚችል እውቀት ያለው የሰው ሃይል በመታጠቅ ወደ አዲስ ምዕራፍ ለመሸጋገር ተዘጋጅቷል። አዲስ አበባ ስማርት ከተማ ለመሆን የሚያስችላትን ስትራቴጂ ነድፋ ጉዞ ጀምራለች። ከተማን ስማርት ማድረግ ማለት የከተማውን ነዋሪ የዕለት ተዕለት እንቅስቃሴ ወይም በጥቅሉ የኑሮ መስተጋብር ማቅለል ሲሆን ይህ ሊሳካ የሚችለው በቴክኖሎጂ ሲደገፍ በተለይም ነዋሪውን በቅድሚያ በቴክኖሎጂ በመመዝገባ መረጃ መያዝ ሲቻል ነው። ለዚህም በአሁኑ ወቅት ዓለም በእጅጉ ትኩረት የሚሰጠውና ወቅታዊ ጉዳይ የሆነው የልደት ምዝገባ ስርዓት ለማናቸውም የማንነት አስተዳደር ስርዓት / Legal Identity Management/ መነሻ እንደመሆኑ መጠን ዘርፉ ዓለም በሚመራበት ዘመናዊ ስርዓት በመምራት ከተማችን ስማርት እንድትሆነ ይህ ተቋም የጀረባ አጥንት ሆኖ የሚያገለግል ይሆናል። በዋናነትም ሃብትን ለማስተዳደር እና ህገ ወጥነትን ለመከላከል ከተቋማት ጋር በቴክኖሎጂ በመቀናጀት መተሳሰርን እጅግ የሚያስፈልግ ሲሆን የዚህ ተቋም መረጃ ደግሞ ሚናው የጎላ ነው። ይህንን ከመተግበር አኳያ ከመሬት ስርዓት ጋር የቴክኖሎጂ ቅንጅት በመፍጠር የመጣውን አበረታች ለውጥ ለዓብነት ማንሳት ይቻላል። ተቋሙ በ2018ዓ.ም የሲቪል ምዝገባ ስርዓትን በተሟላ ሁኔታ የሚመራ ፣ የሚያደራጅ እና ምዝገባዎችን በየዕለቱ ተንትኖ ለከተማው ማህበራዊ እና ኢኮኖሚያዊ ጉዳዮች ውሳኔ አጋዥ መረጃ የሚያቀርብ ይሆናል። የዲጂታል አገልግሎትን በማቀላጠፍ ነዋሪው ማንኛውንም አገልግሎት ለማግኘት ወደዚህ ተቋም መምጣት ሳያስፈልገው በኦንላይን አገልግሎት የሚያገኝበት ስርዓት እ.ኢ.አ በ2017ዓ.ም ዕውን ይሆናል። የከተማው የነዋሪነት መታወቂያ / RID/ የአሽከርካሪነት ፈቃድን፣ የትራንስፖርት አገልግሎት የሚሰጥባቸው ደረሰኞችን እንዲሁም የባንክ ATMን በአንድ ላይ ተክቶ የሚያገለግልበትና ሃብትን ከብክነት የሚታደግበት ስርዓት ይዘረጋል። ከዚህ በተጨማሪም የሞባይል ስልክ እንደ መታወቂያ የሚያገለግልበትን የ"ዲጂታል ቀበሌ መታወቂያ መተግበርያ / Digital Kebele ID Application " ተግባራዊ ለማድረግ የመጨረሻ ምዕራፍ ላይ እንገኛለን። ኤጀንሲያችን በሌብነት እና በህገ-ወጥነት ላይ ጥብቅ የሆነ የመከላከል እና እርምጃ የሚወስድ ስርዓት በመዘርጋት ስነ-ምግባር የተላበሰ አገልጋይ ሰራተኛ ያለው ሞዴል ተቋም ለመሆን እየሰራ ያለ ሲሆን ልምዱን የሚያካፍል ጥናት እና ምርምር እንዲሁም አጫጭር ስልጠና መስጠት የሚያስችል የልህቀት ማዕከል ለማቋቋምም ውጥን ይዟል። ይህንን እና ሌሎችንም እቅዶች ለማሳካት አመራሩ እና ከማዕከል እስከ ወረዳ ያለው ሰራተኛ ከመቼውም ግዜ በላይ ዝግጁ ሲሆን እ.ኢ.አ ከ2018ዓ.ም ጀምሮ በሃገሪቱ ከሚኖሩ ጥቂት ስመጥር ሞዴል ተቋማት አንዱ የሚሆነውን የአዲስ አበባ ከተማ አሰተዳደር የሲቪል ምዝገባ እና የነዋሪነት አገልግሎት ኤጀንሲ ሪፎርም ከባልደረቦቼ ጋር ለመምራት በመታደሌ ኩራት ይሰማኛል። አዲስ የአገልግሎት ምዕራፍ በአዲስ ጅማሮ!